ദോഹ:വിദ്യാർത്ഥികൾക്ക് ആഗോള വിദ്യാഭ്യാസ രംഗത്ത് പുതിയ അവസരങ്ങളും കൃത്യമായ വഴികാട്ടലും ഉറപ്പാക്കുന്ന ഐ സി സി സ്റ്റുഡൻസ് ഫോറം നേതൃത്വം നൽകുന്ന
'ഗ്ലോബൽ പാത്ത്വേസ് യൂണിവേഴ്സിറ്റി കണക്ട് സീരീസ്' പാർട്ട് II സെപ്റ്റംബറിൽ ആരംഭിക്കുമെന്ന് ഇന്ത്യൻ കൾച്ചറൽ സെന്റർ (ഐ സി സി )
പത്രകുറിപ്പിൽ അറിയിച്ചു.
ആദ്യ പതിപ്പിന് ലഭിച്ച മികച്ച പ്രതികരണത്തെത്തുടർന്നാണ് വെബിനാർ സീരീസിന്റെ അടുത്ത ഘട്ടം സംഘടിപ്പിക്കുന്നത്.
അമേരിക്ക, യുകെ, കാനഡ, ഓസ്ട്രേലിയ, യൂറോപ്പ്, ദൂരപൂർവ്വ ഏഷ്യൻ (Far East) രാജ്യങ്ങൾ എന്നിവിടങ്ങളിലെ പ്രമുഖ സർവകലാശാലകളിൽ നിന്നുള്ള അഡ്മിഷൻ മേധാവികൾ രണ്ടാം ഘട്ടത്തിൽ പങ്കാളികളാകും. അന്താരാഷ്ട്ര സർവകലാശാലകളിലെ പ്രവേശന നടപടിക്രമങ്ങളെക്കുറിച്ചും, ആഗോളതലത്തിൽ ശ്രദ്ധിക്കപ്പെടുന്ന പ്രൊഫൈലുകൾ എങ്ങനെ കെട്ടിപ്പടുക്കാമെന്നതിനെക്കുറിച്ചും സമഗ്രമായ വിവരങ്ങൾ ഈ ഘട്ടത്തിൽ പങ്കുവെക്കും.
വെറുമൊരു വിദ്യാഭ്യാസ വെബിനാർ സീരീസ് എന്നതിലുപരി, ഉയർന്ന പഠനത്തിനും ഭാവി നേതൃത്വത്തിനും തലമുറയെ പ്രാപ്തരാക്കുന്ന പ്രധാന സംരംഭമാണിത്. കേവലം അക്കാദമിക് മികവിനപ്പുറം കൗതുകം, വ്യക്തിത്വം, കഴിവ് (Curiosity, Character, Capability) എന്നിവയ്ക്കും തുല്യ പ്രാധാന്യമുള്ള ഇന്നത്തെ ആഗോള ലോകത്ത് വിദ്യാർത്ഥികൾക്ക് വലിയ സഹായമായിരിക്കും ഈ പരിപാടിയെന്ന് ഐ സി സി വൃത്തങ്ങൾ വ്യക്തമാക്കി.
